Aithisgean rannsachaidh a bhios a' fiosrachadh co-dhùnaidhean poileasaidh

'S ann air leth cudromach a tha rannsachadh dhan Ghàidhlig, agus a bharrachd air a bhith a' toirt taic do rannsachadh, tha Bòrd na Gàidhlig a' dèanamh feum de thòrr rannsachaidh a tha daoine eile air a dhèanamh.

Tha rannsachadh a' sealltainn suidheachadh na Gàidhlig agus dè bu chòir a dhèanamh chum maith a' chànain agus tha e a' dearbhadh luach a' chànain. Cuideachd tha e air leth cudromach gun tèid rannsachadh a dhèanamh tro mheadhan na Gàidhlig agus chan ann dìreach mun Ghàidhlig.

Tha rannsachadh air mion-chànanan eile cudromach do dh'obair Bòrd na Gàidhlig agus bidh sinn bho àm gu àm a' dol an sàs ann an rannsachadh ann an co-bhuinn ri buidhnean-cànain bho dhùthchannan eile. A bharrachd air daoine fa leth, tha buidhnean-rannsachaidh ann agus co-labhairtean bliadhnail mar Rannsachadh na Gàidhlig. Tha na h-oilthighean agus colaistean a' brosnachadh rannsachadh air tòrr chuspairean co-cheangailte ris a' Ghàidhlig, gu seachd àraidh le taic a' Bhùird tron lìonra Soillse, agus tha na buidhnean Gàidhlig fhèin a' toirt taic do rannsachaidhean feumail.

Gheibhear aithisgean airson rannsachadh a tha a-nis air am foillseachadh gu h-ìosal. Air ùrachadh 27 Giblean 2011.